KIMBERLEY – ’n Verdere 42 (of 43) flaminke gaan tussen Oktober en November vrygelaat word.
So sê Mike Bolhuis, ’n privaat ondersoeker van Pretoria, wat die reddingspoging van die flaminke van Kamfersdam, in Kimberley, vroeër die jaar uitgevoer het.
Ongeveer 238 van 3 000 flaminke en eiers wat uit die droogtetoestande by die Kamfersdam gered was, is tot dusver vrygelaat.
153 Flaminke in aanhouding
In totaal is daar nog 153 flaminke in aanhouding, 95 by die nasionale dieretuin van Suid-Afrika en 58 by die Lory Park-dieretuin.
“Ongeveer 117 (of 120) flaminke kan nie vrygelaat word nie,” sê Bolhuis.
“22 (of 25) Flaminke het fisiese tekortkominge en 95 ander het pokke en kan nie vrygelaat word nie.”
Bolhuis sê daar is ook nog gevriesde karkaste van flaminke by eksterne fasiliteite. Hy sê dit moet nog in berekening gebring word. Die veeartsenykundige span moet besluit of nog monsters vir toetse geneem moet word voordat dit van kant gemaak word.
Flaminke se redding beloop R1.6 miljoen
Luidens state wat deur SRE Developements vir die Pan-African Association of Zoos and Aqaura (PAAZA) voorberei is, het die uitgawes van die reddingspoging van die flaminke R1.6 miljoen beloop.
Bolhuis sê die belangrikste elemente in die vasstelling van die lewensvatbaarheid van so ‘n groot bewaringsgebeurtenis is die totale koste wat daaraan verbonde is. Alhoewel die twee hoofsentrums ‘n volledige boekhouding het, het verskillende fasiliteite wat gehelp het die kostes gedra en het hulle direkte finansiering en skenkings van eksterne bronne ontvang.
Nie-winsgewende organisasies se uitgawes
Donasies ontvang: R497 545
Plaaslike vervoer: R47 148
Vrywilligers se uitgawes: R29 705
Pretoria-fasiliteit: R380 365
Flaminkvoeding: R92 807
Totale uitgawes: R511 471
PAAZA se uitgawes
Donasies ontvang: R1 049 968
Plaaslike vervoer: R154 712
Vrywilligers se uitgawes: R105 743
Kimberley-fasiliteit: R390 908
Flaminkvoeding: R92 807
Totale uitgawes: R1 142 291
