‘n Spaanse vrou, Beatriz Flamini (50), het 500 dae ondergronds deurgebring vir ‘n wetenskaplike eksperiment oor die uitwerking van uiterse isolasie op mense. Die eksperiment het ook gekyk na hoe om ondergronds te lewe kan inmeng met die menslike liggaam.
Flamini het gesê sy het “baie goed” met haarself oor die weg gekom en het nie gevoel sy wil al mense sien nie.
Tydens die eksperiment, wat in ‘n ondergrondse grot naby Motril, Suid-Spanje plaasgevind het, het Flamini 70 meter (230 voet) ondergronds gebly en het net vir ‘n week uitgekom toe ‘n internetkonneksie, wat haar toegelaat het om hulp te ontbied in ‘n noodgeval, onklaar geraak het. Flamini is gemonitor deur ‘n tegniese span, wat kos by ‘n uitruilpunt in die grot gelos het sonder om kontak met haar te hê. Flamini het gesê dat sy haar tyd spandeer het om met behulp van kunsmatige ligte te lees, te oefen en wollerige hoede te brei. Haar ervaring is deur twee kameras gedokumenteer en sal deur die Spaanse produksiemaatskappy Dokumalia in ‘n dokumentêr omskep word.
Die Spaanse minister van toerisme, Hector Gomez, het dit ‘n “uiterste uithouvermoëtoets” genoem, wat hy gehoop het “groot waarde” vir die wetenskap sou hê.
Flamini het gesê een van die moeilikste oomblikke het gekom toe die grot deur vlieë binnegeval is, maar sy het dit “nooit” oorweeg om die uitdaging te laat vaar nie.
“Daar was moeilike oomblikke, en dit is waar dat daar baie mooi oomblikke was, en albei is wat dit moontlik gemaak het om voort te gaan,” het sy gesê.
Bronne: BBC News, Insider, Arab News
