Suid-Afrika het 60 dae gehad om ‘n formele uitleweringsaansoek in te dien dat Atul en Rajesh Gupta aan Suid-Afrika terugbesorg word om op aanklagte tereg te staan, ná die inhegtenisneming van die broers in die VAE vroeg in Junie.
Shamila Batohi, hoof van die Nasionale Vervolgingsgesag (NVG), het Maandag 25 Julie aan joernaliste gesê dat hierdie sperdatum nagekom is.
Die uitleweringsaansoek – wat in beide Engels en Arabies vereis word – is by die VAE-owerhede ingedien.
Intussen het Batohi gesê die Gupta-broers bly in aanhouding nadat hul borgtogaansoeke deur die VAE-owerhede geweier is.
Batohi het nie verdere besonderhede oor die omstandighede oor die borgtogweiering gegee nie en gewaarsku dat daar geen manier is om ‘n “presiese tydlyn” te verskaf van hoe die uitleweringsproses van hier af kan verloop nie.
Die Nasionale Direkteur van Openbare Vervolging (NDOV) het gesê Suid-Afrika se uitleweringsaansoek sal nou voor wat bekend staan as ’n “appèlhof” in Dubai se regstelsel geplaas word.
Daar sal regters bepaal of die aansoek voldoen aan die eise van ‘n streng uitleweringskontrolelys. Dertig dae nadat daardie prosedure voltooi is, sal die saak na die Hooggeregshof geneem word.
Batohi het gesê as die Hooggeregshof ten gunste van die Guptas se uitlewering beslis, moet die VAE se minister van justisie finaal afteken op die broers se deportasie na Suid-Afrika.
“Dit kan ‘n paar maande neem om te finaliseer,” het Batohi gesê.
Bronne: Daily Maverick, MSN, IOL
Volg FiND iT se Facebookblad hier en klik hier om ons app af te laai. Klik hier vir vandag se nuutste nuus. As jy Afrikaanse Nuus op die Moya App wil lees, volg die skakel.
Lees ook: Elon Musk ontken verhouding met Google- medestigter se vrou
