Ná ’n opspraakwekkende lastersaak in Londen is die akteur Johnny Depp en sy eks-vrou Amber Heard Maandag terug hof toe, dié keer in die Verenigde State, vir ’n reuse lastersaak wat handel oor bewerings van huweliksmishandeling.
Die saak tussen die 58-jarige Depp teen Heard (35) sal regstreeks uitgesaai word. Albei sal na verwagting getuig, saam met die akteurs James Franco en Paul Bettany – en die miljardêr Elon Musk.
Die saak sentreer op ‘n rubriek geskryf deur Heard en gedruk in The Washington Post in Desember 2018 waarin sy haarself beskryf as ‘n “openbare figuur wat huishoudelike mishandeling verteenwoordig.” Sy is aanlyn verguis ná haar aanrandingseise.
Die rubriek was getiteld: “Ek het teen seksuele geweld gepraat – en is deur ons kultuur se toorn in die gesig gestaar. Dit moet verander.”
Die aktrise noem nooit vir Depp nie, wat sy op die stel van die 2011-rolprent The Rum Diary ontmoet het en met wie sy van 2015 tot 2017 getroud was. Hy het haar egter gedagvaar vir naamskending omdat sy te kenne gegee het dat hy ‘n misbruiker is. Hy wil ook $50 miljoen (R730,7 miljoen) as skadevergoeding hê.
Heard het dit teengestaan en vir $100 miljoen (R1,4 miljard) gevra en gesê sy het “fisieke geweld en mishandeling” deur sy hande ervaar.
Depp se loopbaan het in die nasleep van daardie saak gely. Hy het sy rol as kaptein Jack Sparrow in die Pirates of the Caribbean-reeks verloor.
Depp het ook gesê hy is gevra om uit die Fantastic Beasts-filmfranchise te tree, gebaseer op die boek deur Harry Potter-skrywer J.K. Rowling. Hy is deur Mads Mikkelsen vervang.
Bronne: MSN, Yahoo
Volg FiND iT hier.
Lees ook: Oudpresident Jacob Zuma sal na verwagting Maandag in die hooggeregshof verskyn
