’n Vrou het dit reggekry om van haar eks te ontsnap nadat hy haar glo gemartel en verkrag het.
Henry Mamothame, woordvoerder van die Nasionale Vervolgingsgesag van Suid-Afrika, sê Oupa Nkele (41) het glo sy eks-vrou op 29 Desember 2021 opgelaai om “belangrike sake te bespreek”. In plaas daarvan om na ‘n inkopiesentrum te gaan, het hy glo sy eks-vrou na hulle huis buite Rustenburg geneem.
Daar het hy haar glo met ’n tou probeer verwurg, petrol oor haar uitgegooi en haar verkrag.
Vrou ontsnap
Na die tyd het hy haar glo in sy motor gedwing, maar sy kon daarin slaag om uit die motor te spring, waarna ’n behulpsame persoon haar na die naaste polisiekantoor geneem het.
Nkele het Maandag in die Mogwase-landdroshof, Noord-Wes, op aanklagte van poging tot moord en verkragting verskyn. Sy saak is tot 17 Januarie 2022 uitgestel wanneer hy moontlik vir borg sal kan aansoek doen.
