President Cyril Ramaphosa het Maandag sy ontsteltenis met die jongste statistieke oor verkragting en geslagsgeweld uitgespreek en doen nou ’n beroep op mans om ’n eed af te lê om nie vroue en kinders te verkrag of leed aan te doen nie.
Suid-Afrika is in die greep van ’n “onverbiddelike oorlog” wat teen die liggame van vroue en kinders gevoer word, het president Cyril Ramaphosa in sy weeklikse nuusbrief wat Maandag uitgereik is, gesê.
Die jongste misdaadstatistieke het ‘n toename in verkragting, gesinsgeweld en kindermoorde aan die lig gebring. Tussen Julie en September 2021 is 9 556 mense, van wie die meeste vroue was, verkrag. Dit was ’n toename van 7% in verkragting vergeleke met die vorige verslagtydperk.
Van die byna 73 000 aanrandingsake wat aangemeld is, was meer as 13 000 gesinsgeweldverwant. Die koers van kindermoorde het met byna ‘n derde gestyg vergeleke met die vorige verslagtydperk.
Ramaphosa het in kommentaar op die jongste misdaadstatistieke wat Bheki Cele, minister van polisie, Vrydag bekendgemaak het, ’n beroep op mans gedoen om saam te staan in ’n belofte om mekaar aanspreeklik te hou om nie vroue te benadeel nie.
“As ’n nasie se karakter beoordeel kan word deur hoe dit vroue en kinders behandel, dan skiet ons desperaat tekort.”
Volg FiND iT op Facebook hier en lees meer oor Cyril Ramaphosa hier.
