Tom Watson (56) is al 36 jaar lank ’n paramedikus, 25 van daardie jare as ’n helikopterparamedikus. Vandag gesels hy met ons oor wat dit verg om ’n paramedikus te wees.
Watson is al 33 jaar gelukkig met Shirley getroud en die egpaar het een dogter, Tamzin, (29). Ondanks sy besige loopbaan as helikopterparamedikus, is hy ook ’n private vlieënier en neem hy deel aan die Comrades.
Hy werk sedert Julie 2020 vir ROCKET HEMS-lugambulans.
Waarom ’n paramedikus?
“Ek wou ’n dokter word, maar dit het destyds ’n bietjie vervelig gelyk. Ek is deur ’n vriend aan die wêreld van paramedici voorgestel en het insig gekry oor die geleenthede, hoe dinge werk en hoe dit kan gaan. Dit is toe dat ek my geleentheid in 1985 benut het.”
Wat is die beste deel van jou werk?
“Die beste ding vir my is om kalmte in ’n chaotiese omgewing te skep. Mense hoop te gee. Ek hou ook daarvan om die situasie te beheer en mense rigting te gee in ’n krisistyd.”
En die ergste?
“Behalwe dat ons baie tyd van ons gesinne af weg spandeer, is dit vir my baie moeilik om, as jy alles probeer het om ’n pasiënt se lewe te red en hulle sterf, met hul gesinne te praat en hulle die nuus te vertel. Selfs na 36 jaar is dit nog steeds die moeilikste deel vir my.”
Hoe lank het jy studeer om ’n vliegparamedikus te wees?
“Paramedici studeer en oefen jare lank om ’n graad te verwerf om pasiënte te kan help behandel. Daar is verskillende kwalifikasies vir paramedici. Die hoogste kwalifikasie is ’n graad van vier jaar waarin jy lugmedisyne aanraak. Jy kan egter nie net op ’n vliegtuig spring en begin werk nie. Voordat jy by ’n lug- mediese diens aansluit, moet jy verdere opleiding in lugvaartgeneeskunde ondergaan. Druk verander byvoorbeeld soos die hoogte verander. As jy ons op die helikopters sien, dink jy waarskynlik dat ons net die pasiënt vlieg, maar dit is veel meer as dit. Daar is allerhande veranderlikes om aan te dink. Soms vlieg ons laer as gevolg van lugdruk en sekere beserings. Dit hang alles af van wat verkeerd is met die pasiënt. Om ’n vliegparamedikus te wees, moet jy ’n sekere hoeveelheid ure in die lug doen.”
Wat laat Rocket vir jou uitstaan?
“Op die toneel- ICUbehandeling en vinnige reaksie. Ons doen moeite om pasiënte op die toneel te behandel. Ons het ’n vinnige reaksietyd en vinnige vervoer. Maar die belangrikste is vir my die goue uur wat ons het net nadat die persoon beseer is. Die eerste uur is van kritieke belang vir die behandeling wat jy kry. As jy behoorlike behandeling en stabilisering kry, is jou oorlewingsresultate baie beter.”
