SENEKAL. – Die uitspraak in die borgtogverhoor van die twee verdagtes is tot 20 en 22 Oktober 2020 uitgestel. Die verdagtes sal in aanhouding bly.
Die twee verdagtes word aangekla vir die moord op Brendin Horner (21). Die twee verdagtes het vir die eerste keer op 6 Oktober in die Senekal-landdroshof verskyn waar hulle borg geweier is.
Kapt. Gerhardus Myburgh, van die eenheid vir ondersoekende sielkunde van SAPS, sê dit kan twee weke duur voordat die vingerafdrukke se uitslag bekend gemaak word.
Sekwetje Mahlamba (32) en Sekola Matlaletsa (43) is in ’n taverne in hegtenis geneem nadat Matlaletsa glo vertel het hoe hulle ’n man aangerand het. Myburgh sê volgens getuies het die verdagtes gepraat van ’n voertuig wat geneem is, die beursie van die slagoffer en dat hulle ’n slagoffer met tou aan ‘n paal vasgemaak het. Klere vol bloed is ook in Mahlamba se huis gevind.
Kapt. Myburgh sê die bloed van drie verskillende mans is in Horner se bakkie gevind. Die staat se uitslag is onbekend. Weens die hoëprofielmoord het die staatslaboratorium met die ontleding begin.
