Die Demokratiese Alliansie doen ’n beroep op die uitvoerende burgemeester van Sol Plaatje, Patrick Mabilo, om eerlik met die EPWP-werkers te wees oor die feit dat die Sol Plaatje-munisipaliteit nie genoeg geld het om werkers vir Oktober en November te betaal nie.
Die fonds vir EPWP-werknemers beloop tans slegs R46 000, terwyl ’n bedrag van ongeveer R1 miljoen benodig word om die byna 500 projekwerkers elke maand te betaal. Dit is dus te verstane dat Sol Plaatje vermy om die nuus aan die EPWP-werknemers oor te dra en hulle eerder aanmoedig om aan te hou werk, ondanks die feit dat daar geen geld is om hulle te betaal nie.
Christopher Phiri, DA-koukusleier, Sol Plaatje-munisipaliteit, sê: “Ons veroordeel verder die optrede van die voormalige ANC-burgemeester van die Sol Plaatje-munisipaliteit, Mangaliso Matika, wat aan die EPWP-werkers gesê het dat hulle vandag moet begin werk. Matika het geen outoriteit wat die Sol Plaatje-munisipaliteit betref nie. Waarom het hy homself betrek by iets wat niks met hom te doen het nie?”
“Die DA sal die saak met die burgemeester bespreek. Ons kan nie ‘n situasie duld waarin die EPWP-werknemers mislei word om te werk vir geen betaling nie. As Sol Plaatje nie die moed het om die EPWP-werkers die waarheid te vertel nie, sal ons dit doen.”
“Die DA sal voortgaan om vrae in te dien oor die finansiële toestand van die munisipaliteit. Hierdie maand is dit EPWP-werkers, wie sal dit volgende maand wees? Die volgehoue betaling van lone van werknemers van Sol Plaatje is toenemend onstabiel. Sol Plaatje moet nou al sy kaarte op die tafel lê, sodat ons in die nabye toekoms ‘n salariskrisis kan voorkom.”
