KIMBERLEY. – Louis Meades (46), wat vir poging tot moord, ontvoering en die oortreding van ’n gesinsgeweldbevel teregstaan, het vanoggend weer in die Kimberley-landdroshof verskyn.
Meades is op 23 Januarie in hegtenis geneem nadat hy sy vriendin, Sue-Marie Kramer, na bewering aangerand, probeer ontvoer en probeer omry het.
Die verhoor was geskeduleer vir vandag en môre, maar weens ’n “voorkeur-saak” wat ook vir vandag geskeduleer is, is Meades se saak weer uitgestel.
Ses getuies, onder andere Sue-Marie Kramer en Sherley Meades, Louis se ma, was ook vandag teenwoordig, ná hulle hofdokumente ontvang het om vandag te getuig.
Die saak is uitgestel na 21 November 2019, waar die getuies ook weer teenwoordig moet wees om te getuig teen Meades.
Meades se borgtog word verleng tot die volgende hofdatum.
